«Fangst Forlis Forbod» boklansering og utstillingsopning

Ishavsmuseet har bygd om fjerde etasje og invitera til nyopning denne dagen. Den nye utstillinga omhandlar norsk selfangst og firmaet GC Rieber si rolle i selfangsten. GC Rieber var sjølve navet i norsk selfangst gjennom heile 1900-talet og reiar og medeigar i mange skuter, både på Sunnmøre og i Troms.
Selskapet var i tillegg også oppkjøpar og foredlar av ishavsprodukta, gjennom pelsberederiet, lærfabrikken og skoproduksjonen.
Då demonstrasjonane mot selfangsten var på det sterkaste var det Christian Rieber som åleine tok den største støyten for heile næringa, han tok mot meir enn 250.000 protestbrev og kort. I periodar hadde både han og firmaet politibeskyttelse etter trugslar og rykte om åtak. Denne historia er ein viktig del av utstillinga som også syner firmaet sin overgangen frå selfangst til ekspedisjonsskip.

Forfattar Johannes Bjarne Alme har som del av dette store prosjektet forfatta ei bok om norsk selfangsthistorie og GC Rieber. «Fangst Forlis Forbod – Norsk selfangst og GC Rieber i opp- og nedturar». Boka vert lansert på Ishavsmuseet denne kvelden.
«Fangst Forlis Forbod» er ei faktabok om den stolte selfangstnæringa si oppgang og fall – frå isflaka i Ishavet via catwalken i Paris til gateopprør i EU. Forfattaren tek lesaren med inn i nerven til denne næringa og dokumenterer kor viktig ho har vore for det utviklinga langs kysten og verdiskapinga i Noreg. Boka er på 300 sider og illustrert med meir enn 300 bilete.
Etter boklansering og utstillingsopning vert det servert to rettars middag i museumskafeen, denne gang er det biff av sel med godt tilbehøyr etterfølgt av Crème brûlée og kaffi.